Katarungang Pambarangay

Si Mister ay nambabae habang si Misis ay nasa Greece bilang caregiver.  Natuklasan ni Misis ang lihim ni Mister sa kanyang pagbabakasyon.  Ginulpi pa siya ng Kerida ni Mister ng sila ay kanyang komprontahin.  Ang isyu ay nakarating sa Lupon ng Katarungang Pambarangay kung saan para matapos ang gulo ay pumirma ng kasulatan sa harap ng Punong Barangay, Pinuno ng Lupon at Barangay Secretary.

Napagkasunduan na, si Misis ay hindi na magsasampa ng kasong Concubinage laban kay Mister at ang kanyang Kerida kahit na meron na silang anak,  ibabalik ng Kerida ang nagasto ni Misis sa pagpapagamot sa mga sugat dahil sa pagkakagulpi, at wala na pakialaman sa buhay si Mister at si Misis dahil dalawang buwan buntis pala si Misis sa may mayaman at guwapong boyfriend sa Greece.

Tanong:

Sa tatlong nakapagkasunduan, alin ang ayon sa batas?

Ayon sa batas iyong kasunduang ibalik ng Kerida ang nagasto ni Misis sa pagpapagamot sa mga sugat dahil sa pagkakagulpi.

Hindi ayon sa batas ang kasunduang wala nang pakialaman si Mister at si Misis dahil sa mata ng batas sila pa rin ay mag-asawa hanggat hindi sila legal na naghihiwalay.  Sa mata ng batas sila pa rin ay mag-asawa at may karapatan bilang asawa sa kayamanang maipundar ng isat isa habang nakikisama sa iba.  At nagkakasala pa rin sila sa batas ng tao at ng Diyos sa pagkakaroon ng Kerida at mayaman at guwapong boyfriend.

Hindi rin ayon sa batas ang kasunduang hindi magsasampa ng kasong Concubinage si Misis laban kay Mister kahit meron na silang anak ng kanyang Kerida sa kadahilanang puwedeng magbago ang isip ni Misis at isampa pa rin ang kasong concubinage sa korte hindi siya mapipigilan ni Mister gamit ang kasunduang pinirmahan sa harap ng Punong Barangay.  Ang kasunduan na pinirmahan sa barangay sa usaping hindi pagsampa ng kasong concubinage ay hindi sakop ng Katarungang Pambarangay.