Kasal sa Pilipinas, Ni-divorce sa Europe

Pinakasalan ni Harry si Wilma, isang mayamang babae.  Maglilimang taon pa lamang ang kanilang kasal ay umibig si Wilma kay Joseph.  Si Wilma ay pumunta sa isang maliit na bansa sa Europe, siya ay nating citizen doon, idiniborsyo si Harry at pinakasalan si Joseph.  Pagkalipas ng isang taon, sina Wilma at Joseph ay umuwi sa Pilipinas at naging permanenteng residente dito.

Tanong:

Ang diborsyo ba ni Wilma kay Harry ay kikilalanin sa Pilipinas?

Si Harry ay umibig kay Elizabeth at gusto na niyang pakasalan ito dahil si Wilma naman ay kasal na kay Joseph.  Ayon sa batas ba kapag papakasalan ni Harry si Elizabeth?

Mga Sagot:

Opo. Ang divorce in Wilma kay Harry sa isang maliit na bansa sa Europe ay maaaring kilalanin sa Pilipinas ayon sa itinatadhana ng ating Family Code.  Ayon sa batas, kapag ang Filipino ay nag-asawa ng dayuhan at paglaon ay diniborsyo ng dayuhan sa kanyang sariling bansa para mag-asawang muli, ang Filipino ay binibigyan din ng Family Code ng parehong karapatang mag-asawa muli.  Ayon sa desisyon ng Kataas-taasang Hukuman, ang sitwasyong nagpakasal ang dalawang Filipino sa Filipinas, nakapunta sa labas ng bansa ang asawa kung saan may divorce, naging citizen siya roon at diniborsyo ang asawang naiwan sa Filipinas para mag-asawa muli, ang naiwang asawa sa Filipinas ay binibigyan na rin ng karapatan ng Family Code para mag-asawa muli.

Opo. Ayon sa batas ang pagpapakasal ni Harry kay Elizabeth.  Pero bago ang kasalan, kailangan munang magfile sa korte ng Recognition of Foreign Judgment si Harry doon sa kasal nila ni Wilma.  Kailangan munang ideklara ng hukuman sa Filipinas na kinikilala ng bansa ang divorce sa labas ng bansa sa pagitan ng Filipinong naging dayuhan at ang kanyang asawang naiwan sa Filipinas.  At kapag may desisyon na ang korte, may karapatan na ring mag-asawa muli ang asawang naiwan sa Filipinas.